FIN DE SEMANA DE LNB





       O sábado en Ponte de Outeiro (Castro de Rei) disputarase a penúltima xornada da Conferencia Norleste. De novo o equipo pontino ten preparados centos-miles de carballos para repoboar o país. Para conseguir tamaño obxectivo entregará unha quercus robur a cada participante. Esta magnífica iniciativa, que xa se realizara a temporada pasada, vai estar complementada por un churrasco que se ofrecerá a cada participante que así o queira. "Evidentemente, este ano si que van enraizar os carballos", dixeron de Casa Alvariño. Que razón teñen, pois cada xogador/a amais da árbore que levará para plantar na súa terra levará no colon descendente o abono necesario para nutrir as súas raíces. 
       
        A estas alturas de temporada imos facer un repaso daquelas xogadoras e xogadores que máis veces luciron  o escudo da LNB, cada quen formando parte do seu equipo. Hai que puntualizar varias cousas. 
   Primeiro, esta información está recollida da base de datos de todolnb, polo tanto está suxeita a certas particularidades. A saber, da Conferencia Nai non temos constancia das xornadas que xogou cada quen nas tres primeiras temporadas. Da Conferencia Noroeste non temos constancia das xornadas que xogou cada quen na temporada 2009-2010. Da Conferencia Rías Baixas temos os datos completos. 
    Segundo, non aparecen tod@s, pois serían unhas táboas interminables, polo tanto, decidimos incluír a quen xogou máis de 20 xornadas na Norleste e Noroeste e máis de 25 na Conferencia Rías Baixas. 

        Finalmente, insistir que a LNB sobrevive grazas a persoas como as que aparecen nestas táboas, pois son elas e moitas máis que veñen detrás, as que dan valor a un deporte tradicional marabilloso coa súa constancia e compromiso. Igual que noutros deportes se valora o número de partidos disputados, no noso deporte debemos recoñecer a estar persoas como se merecen.  Daniel Rodríguez e Geni Rodríguez xogaron todas e cada unha das xornadas desde a temporada 2008-2009. Isto significa que nin a gripe, nin a reuma, nin as lesións, nin outros compromisos fixeron que estes dous referentes da LNB deixaran de lucir o escudo LNB durante 10 anos en todas as xornadas da Conferencia. Realmente, extraordinario. Non pensamos que haxa nada similar en ningún outro deporte. Franco, Markytos, Xermán, Flores, Villarino, Coedo, Regueiro, Isma e Lucía son outros dos referentes do noso deporte.
        









        Nas Encrobas xogará a Conferencia Noroeste a súa 13ª xornada de liga. Aquí aparecen os xogadores e xogadoras que levaron no corazón o escudo LNB con honor e satisfacción en máis xornadas. Lois Fontán é o referente da Conferencia Noroeste, dado que estivo na creación desta e mantense xogando 11 anos despois. Está moi preto das 100 xornadas. Berdillo e Viqueira son outros xogadores de referencia, con 80 e 79 xornadas respectivamente.





       
       Na simbólica praza de Fefiñáns, Cambados, disputarase a xornada 16 da Conferencia Rías Baixas. A Conferencia máis nova da LNB ten a tres xogadores centenarios e a dúas xogadoras que ao final de temporada poderán chegar a esta cifra estratosférica de xornadas xogadas. Xan Rodiño acudiu a todas e cada unha das xornadas e Piru faltou a unha, exclusivamente. Carolo faltou a 5 xornadas e cerra o trío de centenarios da Conferencia. Elena Glez, Lu, Gelín, Luís Camiña, Luís Gon, Taxeiro, Manolo Fariña, Ángel, Bego, Belmira, Ricar, Suso, Casilda, Lito, Juanma, Álvaro, Vanessa, Cheli, Marga Puente, Chefa, JM Camiña .... tod@s por enriba das 80 xornadas xogadas, son xogadores/as que debe coñecer tod@ b@ aficionado á billarda. 




O PIRUVARADO





       Se o pirogravado é unha técnica de debuxo que consiste en queimar un soporte, sexa madeira, papel ou cartón, cun pirogravador, o  PIRUVARADO é unha técnica de golpeo da billarda que permite lanzala directamente cara á boca do varal desde a liña de saída. 








       Agora que semella rematar a temporada de pavillóns, presentamos os datos históricos dunha especialidade de golpeo moi apreciada no mundo da billarda. Esta é o VARADO. Palabra creada pola LNB para definir a acción coa cal a billarda entra no varal utilizando un único golpe, e sempre que a billarda estivera situada detrás da liña de saída. Así, temos unha base de datos con todos os resultados das xornadas LNB desde que se recollen en actas. 
       A negra barba de Piru encabeza a clasificación histórica con folgura. Só el, Xan Rodiño e Daniel Rodríguez poderán nas vindeiras temporadas acercarse a cifras bicentenarias. Os demais deberán competir unha decena de anos máis, polo menos. Facendo comparación co mundo do boxeo, hai palanadores especialistas en KO e palanadores con golpeo menos potente e máis preciso. Deste xeito, vemos como os que ocupan as cinco primeiras posicións son xogadores de KO, cunha dilatada traxectoria na LNB.  Tanto, Xan Rodiño, Daniel Rodríguez, Luís Camiña como Markytos teñen un Título Nacional nesta categoría de Varados, o que indica que están os que son. Por detrás veñen a enorme velocidade dous palanadores, que tamén levan o KO nos seus paláns, como X. Collazo e Ricar, que teñen unha traxectoria máis curta que os cinco magníficos, non obstante, presentan números de posto 5, e dentro dunhas cantas temporadas alcanzarán a tan soñada centena de varados. 
       Salientar a Bego, quen con 31 varados é a única muller que podería optar ao Título Nacional da Categoría. Despois aparecen todos aqueles que fixeron na súa traxectoria deportiva vinte ou máis varados. Moitos destes xogadores xa non están en activo, como Iván López, Cristián Puente, Xoro, Ginés Rodríguez, Eric, Rubén Otero, Chupi, Andrés Rodríguez, Roi Morís, Hugo, Balea, Luís Enrique, Basilio, Iván Puente e Xosé Miguel, pero que forman parte da historia recente da billarda e teñen un lugar destacado no Alboio da Fama da LNB. 









PARTICIPACIÓN









      A 11 de abril de 2018 os números de participación na mellor liga de billarda do mundo son estes. Estes números correspóndense a xogadores e xogadoras que pertencen a cada unha das tres Conferencias LNB. Aquelas persoas que xogaron en diferentes conferencias só se contabilizan na súa Conferencia de orixe. 








    Na temporada 13 da LNB (se contamos os dous primeiros anos nos que só se xogaba no Norleste) o número de xogador@s está por enriba dos 300. Algo que se repite desde a temporada 2015-2016 cando o número de Conferencias se reduciu a 3. Desde o ano 2009 ata o 2015 houbo sempre máis de 3 Conferencias, chegando a haber 6 como máximo. Entón, podemos afirmar que estamos por enriba do teito que pode soportar a actual loxística LNB, xa que se todos e todas as xogadoras acudiran a todas as xornadas habería que adaptar os sistemas de competición para dar acubillo a tanto palanador e palanadora. Daquela, extraordinario traballo de difusión polo territorio galego deste deporte tradicional marabilloso. 




As características da nosa climatoloxía fortalece as ansias deste grupo irredutible de bravos galegos e galegas 

















CRÓNICA 12 XORNADA NOROESTE

       A xornada 12 da Conferencia Noroeste, programada para xogarse na Silva (Cerceda), finalmente trasladouse a Castenda da Torre (Tordoia), onde dispoñen dun pavillón de última xeración con teito retráctil, que favorece a formación dunha temperatura excelente para a cría do pingüín. En definitiva, unha magnífica xornada que puxo a proba a fortaleza da raza galega.


   


      A superficie impermeable provocou estéticas imaxes do golpeo da billarda. Mirade nas fotos de abaixo como os fantásticos espadachíns do noroeste buscan a billarda no aire de Castenda.


    Iso si, algún destacado palanador e palanadora da Conferencia Rías Baixas, que asistiron á xornada, quedaron asombrados polo obstáculo metálico (véxase a caseta de obra de detrás) que a organización instalou na pista para dar soporte ao sistema VAR. Desde a caseta, un xuíz único estivo controlando os monitores de televisión por se se producía algunha xogada de dubidosa interpretación. Impresionante os avances loxísticos desta Conferencia. Pavillón de última xeración e sistema de Vídeo Arbritraxe.



   

      No aspecto competitivo, Collazo ganou a xornada, nunha final emocionantisima contra o maior talento infantil da LNB, Juanma Camiña. Bego ganou en Feminina e Abel en infantil.


  




      Agora as clasificacións quedan deste xeito. Nada por decidir na Categoría de Equipos. Serán Campo da Feira e APB Santa Marta quen acudan á Final LNB 2018. Na categoría Individual Absoluta as cousas complícanse para Dilan e Andrade e aumentan as esperanzas de Apóstolo e Julio Vilas. Incluso Óscar Ponte pode ter algunha mínima posibilidade. Polo demais, pensamos que poucos cambios se van dar nas 3 últimas xornadas. O título é de Collazo e as outras dúas prazas de podio estarán entre Gándara, Edu e Xulio Ponte.







CRÓNICA FIN DE SEMANA LNB RÍAS BAIXAS


       O titular da xornada de Redondela non pode ser outro que a desorbitante actuación de Rinoceronte. O equipo pontevedrés impúxose nunha xornada despois de dous anos de travesía pola sabana. A última vez que ganou unha xornada o equipo do corno foi na xornada 9 da temporada 2015-2016 do 16 xaneiro de 2016. Rinoceronte intenta recuperar na recta final da temporada os ptos que o separan na última praza de Finalista LNB 2018. Pensamos que é moi tarde para restar 94 ptos de desvantaxe con Lúa de Forza, de todos os xeitos na billarda case todo é posible. 





       En canto á categoría de Equipos Femininos continúa a pugna entre os tres grandes equipos da LNB, Valpaços Terra Quente, Corredoiras e Gharaboto. Corredoiras e Gharaboto non desisten na súa persecución do líder e gran favorito Valpaços. Este equipo non abandonou en toda a temporada o primeiro posto, non obstante, foi vendo como a distancia cos seus perseguidores foi minguando.  Esta xornada a vitoria foi para o equipo de Bueu. Esta categoría continuará ata a derradeira xornada coa emoción do título. O podio está claro que será ocupado por estes tres equipos, xa que os demais están moi lonxe. 









       O ganador da xornada foi o líder Xan Rodiño, seguido de Lu e de Daniel. Curiosamente son os mesmos xogadores da xornada 11 de Vilaboa. A única diferenza é que se intercambiaron os postos Daniel e Lu. Habería que buscar nos arquivos todolnb para comprobar se algunha vez se produciu esta circunstancia, que coincidiran as mesmas persoas subindo a un podio de xornada. Tamén, outra curiosidade é que os ganadores nas categorías individuais son os líderes actuais das mesmas. 



CATEGORIA ABSOLUTAdo EQUIPO
1XAN RODIÑOLÚA DE FORZASANXENXO
2LULÚA DE FORZASANXENXO
3DANIELRINOCERONTEPONTEVEDRA
CATEGORÍA FEMININAdo EQUIPO
1BEGOCORREDOIRASBUEU
2CHEFACORREDOIRASBUEU
3ADRIANAVALPAÇOS TERRA QUENTEVIGO
CATEGORÍA INFANTILdo EQUIPO
1JUANMALÚA DE FORZASANXENXO
2ÓSCARARMADIÑAPOIO
3HUGOGHARABOTOMARÍN
CATEGORÍA EQUIPOS
RINOCERONTEPONTEVEDRA
CORREDOIRASBUEU
LÚA DE FORZASANXENXO


   
     En definitiva, despois de sumar os puntos desta xornada as clasificacións están decididas en canto ao título. Así, en Categoría Feminina, Bego na próxima xornada será campioa matemática. En Categoría Infantil, a Juanma sucederalle o mesmo. Na Categoría de Equipos, Corredoiras, aínda que non dun xeito matemático, pero si real, na vindeira xornada conseguirá o título. Só quedarían a Categoría Individual Absoluta, na cal Xan dou un paso case definitivo nesta 15 xornada, e a Categoría de Varados, na cal tamén dou un golpe case decisivo o de Lúa de Forza. 
        A emoción está nos postos de podio en todas as categorías. Así, na Individual Absoluta, Salva asaltou o segundo posto de Ricar e agora ten 5 ptos máis que o ex-Coroceiro Nacional. Bego continúa no cuarto posto a outros 5 ptos de Ricar. Por detrás continúan Piru e Che a 10 ptos da de Bueu. O que se aproxima ao trote furibundo dos rinocerontes do Serengueti é Daniel, quen xa se situou a 17 ptos do terceiro posto do podio. Este palanador é o que máis ptos acumulou nas tres últimas xornadas cunha media de 22 ptos por xornada. Este feito xunto coa irregularidade das actuacións dos 6 primeiros en pavillón fixo que entrara a formar parte dos aspirantes a podio final. 
       Na Categoría Feminina, Lu asegurou o segundo posto final coa súa enorme actuación de 22 ptos. O posto de podio que aínda non ten dona é o terceiro. Chefa e Adriana son as aspirantes a este lugar de privilexio. A Campioa Nacional ten 4 ptos de vantaxe sobre a talentosa palanadora de Vigo.  Elena Sabarís e Elena Glez están algo lonxe, mais aínda manteñen algunha esperanza de alcanzar esta praza, pois a billarda é imprevisible. 

      Onde se coce a verdadeira empanada de millo das Rías Baixas é nos lugares máis quentes do forno da LNB. Isto é, naqueles lugares que dan dereito a participar na Final Nacional 2018. Na Categoría Absoluta, pensamos que unha ducia de xogadores están metidos en fariña, por así dicilo. Deberán apurar cada punto e cada carreira para entrar entre os elixidos para a gloria. Pensamos que desde Lito, 173 ptos, ata Papi, 148 ptos, todo é posible. Faltan por disputarse 93 ptos. O mesmo sucede na Categoría Feminina, desde Marisa, 89 ptos, ata Ainhoa, 65 ptos, aínda hai marxe de recuperación.









Vemos a Marisa explicándolle a Piru os perigos de realizar o "salto trigresa" desde o armario empotrado ata a cama sen levar o elemento de seguridado chamado arnés.



Marabilloso agasallo do concello de Redondela. Unha mochila cargada de cultura literaria. A alegría das caras das ganadoras na categoría feminina é anterior a que miraran que había dentro das fantásticas saquetas azuis.



A quen máis ilusión lle fixo os premios do concello de Redondela foi aos máis cativos, pois deste xeito engadiron un exemplar máis á colección dos Bolechas. 



Os máis beneficiados cos agasallos foron os ganadores na Categoría Absoluta, xa que as 700 páxinas do magnífico libro van acompañar as súas horas de lecer durante os vindeiros lustros. 



A pista PVC do Municipal de Redondela favoreceu o avance das billardas, mais non ten tanto poder deslizante como outras superficies. Houbo 23 varados soamente.



Armadiña nunca esquece hidratar, mineralizar e supervitaminar ás súas xogadoras e xogadores.






Vemos no fondo da pista ao Director Técnico encargado pola LNB de instruír aos xuíces de varal sobre a implantación do VAR, L. Camiña, como da indicacións a un dos xuíces.   



Marga Caldas en posición de semi flexión de pernas e armado de brazo (para ensinar en escolas deportivas de billarda).



O equipo Corredoiras camuflado entre as bancadas da mesma cor que os seus uniformes.









Reacción de CHE despois de que lle anunciaran os puntos conseguidos polo seu equipo Rinoceronte, 95 ptos (a súa mellor marca histórica de puntos desde a súa creación, fundación ou nacemento espontáneo).  



Entre tantas liñas as billardas trabucábanse e de cando en vez collían un camiño equivocado. 





CONFERENCIA NOROESTE


      Mañá editaremos a crónica de todo o que sucedeu na fantástica, épica, lírica... xornada da Conferencia Noroeste. 

Pavillón descapotable de última tecnoloxía de Castenda (Tordoia), preparado para soportar choiva, vento, frío, neve, temporal e... adaptado para filtrar as raiolas no caso que fose necesario. En definitiva, a LNB na vangarda das grandes infraestruturas construídas polo ser humano.


Podios 1-Collazo 2-Juanma 3-Lito  Fem-Bego  Inf-Abel (recolleu Miguel)